ХЭКУМ КЪЭЗЫГЪЭЗЭЖАХЭМ Я МАХУЭ
ШыщхьэIум и 1-р Зи хэку къэзыгъэзэжа адыгэхэм я махуэщ. Фигу къэдгък1ыжынщи, ар Адыгэ Республикэм къэрал унафэк1э щагъэлъап1э 1998 гъэ лъандэрэ. Шыщхьэ1ум (августым ) и япэ махуэр Адыгей республикэм щ1игъэлъап1эр а гъэм япэ дыдэу Косово къик1ыжу адыгэ лъэпкъэгъухэр къызэрык1уэжаращ.
Къэбэрдей-Балъкъэрми а махуэр Хасэхэм щагъэлъап1э. Нобэ Къэбэрдей-Балъкъэрым, Адыгейм, Къэрэшей -Шэрджэсым щопсэу зэман зэщымыщхэмк1э къэк1уэжа адыгэхэр Тыркум, Сирием, Югославием, Израилым, Германием, Америкэм къик1ыу.
Иорданием къыщалъхуа, хэкужьыр илъэс 45-рэ хъуауэ псэупIэ зыщIыжа Абеикъуэ Шухьэиб илъэс 80 зэрырикъуар иджыблагъэ Бахъсэн къалэ щагъэлъэпIащ.
Пшыхьыр къызэIуихащ «Адыгэ псалъэ» газетым и редактор нэхъыщхьэ, Къэбэрдей Адыгэ Хасэм и тхьэмадэ ХьэфIыцIэ Мухьэмэд.
— Узэса псэукIэр къызэбнэкIыу нэгъуэщI щIыпIэ, ар адэжь щIыналъэу щытми, гъащIэр щызэтебухуэжыныр тыншкъым, – жиIащ Мухьэмэд. – Ауэ апхуэдэ гугъуе-хьым къигъэувыIакъым Шухьэиб. ИстамбылакIуэм и щIэблэхэм ящыщу япэу адэжь лъахэм къихьэжахэм ящыщщ ар. Хэкум хуиIэ лъагъуныгъэм и фIыгъэкIэ лъэпощхьэпо псори къызэринэкIри, къыздэкIуэжам щекIуэкI гъащIэм зыхигъэзэгъэжащ. Абы лъандэрэ илъэс 45-рэ дэкIащи, цIыхухэм фIыуэ къалъагъуу, и пщIэр лъагэу мэпсэу. НэхъыжьыфIым сохъуэхъу и щIэблэм я гуфIэ-гъуэ куэд илъагъуу адэкIи гъащIэ узыншэ ирихьэкIыну.
Дунейпсо Адыгэ Хасэм и тхьэмадэ Сэхъурокъуэ Хьэутий къыщыпсалъэм къыхигъэщащ Абеикъуэ Шухьэиб куэд щIауэ зэрицIыхур, и дуней тетыкIэкIэ адыгэлI нэсым и щапхъэу къызэрилъытэр. Абы жиIащ ДАХ-м и дамыгъэ нэхъыщхьэмрэ щIыхь тхылъымрэ Абеикъуэм зэрыхуагъэфэщар икIи ахэр иритыжащ.
Псалъэ гуапэ куэд хужаIащ а пщыхьэщхьэм Шухьэиб. ЗыгъэлъэпIа, зыгъэгушхуа и благъэхэм, ныбжьэгъухэм, гъунэгъухэм фIыщIэ яхуищIри, Абеикъуэм жиIащ Хэкум къызэригъэзэжам щыхущIегъуэжа зы махуи къызэрыхуимыхуар, и гъащIэм и нэхъыбэр адэжь щIыналъэм къызэрыщигъэщIамкIэ насыпыфIэу зыкъызэрилъытэжыр.
Зэхыхьэр ягъэдэхащ Къэбэрдей-Балъкъэр, Ингуш республикэхэм щIыхь зиIэ я уэрэджыIакIуэ Зеущэ Iэуесрэ КъБР-м, АР-м, Осетие Ищхъэрэ-Алание, Ингуш республикэхэм щIыхь зиIэ я артист Лосэн Тимуррэ ( Хъуажь Фахъри).
